Editor's Picks Health

കേരളത്തിൽ ഇന്ന് 24 പേർക്ക് കൊവിഡ്-19 സ്ഥിരീകരിച്ചെന്ന് മുഖ്യമന്ത്രി

സംസ്ഥാനത്ത് ഇന്ന് 24 പേർക്ക് കൊവിഡ്-19 സ്ഥിരീകരിച്ചതായി മുഖ്യമന്ത്രി പിണറായി വിജയൻ. വാർത്താ സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. ഇതോടെ ഇതുവരെ രോഗം സ്ഥിരീകരിച്ചവരുടെ എണ്ണം 265 ആയി ഉയർന്നു. കാസർകോട് 12 പേർക്കാണ് ഇന്ന് രോഗം സ്ഥിരീകരിച്ചത്. എറണാകുളത്ത് മൂന്ന്, തിരുവനന്തപുരം രണ്ട്, പാലക്കാട് ഒന്ന് എന്നിങ്ങനെയാണ് മറ്റ് കണക്കുകൾ. ഇന്ന് രോഗം സ്ഥിരീകരിച്ച 9 പേർ വിദേശത്ത് നിന്ന് വന്നവരാണെന്നും മുഖ്യമന്ത്രി വ്യക്തമാക്കി. കേരളത്തിൽ ഇതുവരെ രോഗം സ്ഥിരീകരിച്ചവരിൽ 191 പേർ വിദേശത്ത് നിന്നെത്തിയവരാണ്. ഏഴ് പേർ വിദേശികളും. സമ്പർക്കത്തിലൂടെ രോഗം ബാധിച്ചത് 67 പേർക്കാണെന്നും മുഖ്യമന്ത്രി വ്യക്തമാക്കി. ഇതുവരെ കൊവിഡ് നെഗറ്റീവായത് 26 പേരാണ് ഇതിൽ നാല് വിദേശികളും ഉൾപ്പെടുന്നുണ്ട്.

​ഇന്നലെ രോഗം സ്ഥിരീകരിച്ചത് 7 പേർക്ക്

സംസ്ഥാനത്ത് ഇന്നലെ 7 പേർക്കായിരുന്നു കൊവിഡ്-19 സ്ഥിരീകരിച്ചത്. കാസർകോട് തിരുവനന്തപുരം ജില്ലകളിൽ രണ്ട് പേർക്ക് വീതവും കൊല്ലം, തൃശൂർ, കണ്ണൂർ ജില്ലകളിൽ ഓരോ ആൾക്ക് വീതവുമാണ് ഇന്നലെ രോഗം സ്ഥിരീകരിച്ചത്. ഇതിൽ ആറ് പേർക്കും സമ്പർക്കത്തിലൂടെയായിരുന്നു രോഗം പകർന്നത്. കണ്ണൂരിൽ രോഗം സ്ഥിരീകരിച്ച ആൾ മാത്രമായിരുന്നു വിദേശത്ത് നിന്നെത്തിയത്. തിങ്കളാഴ്ച 32 പേർക്കും ഞായറാഴ്ച 20 പേർക്കും കേരളത്തിൽ കൊവിഡ്-19 സ്ഥിരീകരിച്ചിരുന്നു.

​ചൊവ്വാഴ്ച നിരീക്ഷണത്തിലുണ്ടായിരുന്നത് 1,63,129 പേർ

ഇന്നലെ വൈകീട്ട് നടന്ന വാർത്താ സമ്മേളനത്തിൽ മുഖ്യമന്ത്രി നൽകിയ കണക്ക് പ്രകാരം സംസ്ഥാനത്ത് 1,63,129 ആളുകളായിരുന്നു നിരീക്ഷണത്തിലുണ്ടായിരുന്നത്. 1,62,471 പേര്‍ വീടുകളിലും 658 പേര്‍ ആശുപത്രികളിലുമാണെന്നും അദ്ദേഹം വ്യക്തമാക്കിയിരുന്നു. ചൊവ്വാഴ്ച മാത്രം 150 പേരെ ആശുപത്രിയില്‍ പ്രവേശിപ്പിക്കുകയും ചെയ്തിരുന്നു.

​സംസ്ഥാനത്ത് കൊവിഡ് മരണം രണ്ട്

സംസ്ഥാനത്ത് കൊവിഡ്-19 ബാധിച്ച് രണ്ട് മരണമാണ് ഇതുവരെ റിപ്പോർട്ട് ചെയ്തത്. തിരുവനന്തപുരം മെഡിക്കൽ കോളേജിൽ അതീവഗുരുതരാവസ്ഥയിൽ ചികിത്സയിൽ കഴിഞ്ഞ പോത്തന്‍കോട് സ്വദേശിയായ അബ്‌ദുൾ അസീസ്(68) ഇന്നലെയായിരുന്നു മരിച്ചത്. തിങ്കളാഴ്‌ച രോഗം സ്ഥിരീകരിച്ചതിന് പിന്നാലെയാണ് മരണം സംഭവിച്ചത്. റിട്ടയേഡ് എഎസ്ഐ ആയിരുന്നു അദ്ദേഹം. മാർച്ച് 28 നായിരുന്നു കൊവിഡ് ബാധിച്ചുള്ള കേരളത്തിലെ ആദ്യ മരണം. കളമശേരി മെഡിക്കൽ കോളേജിൽ ചികിത്സയിലായിരുന്ന മട്ടാഞ്ചേരി സ്വദേശിയായിരുന്നു അന്ന് മരിച്ചത്.

​ഇന്ത്യയില്‍ രോഗികളുടെ 1600 കടന്നു

രാജ്യത്ത് കൊവിഡ്-19 രോഗികളുടെ എണ്ണത്തിൽ വൻവർധനവാണ് ഉണ്ടാകുന്നത്. ഇന്ന് വൈകീട്ട് വരെയുള്ള കണക്കുകൾ പ്രകാരം 1637 പേർക്കാണ് കൊവിഡ്-19 സ്ഥിരീകരിച്ചത്. രാജ്യത്തെ മരണസംഖ്യ 38 ആയും ഉയർന്നിട്ടുണ്ട്. രാജ്യം അതീവ ജാഗ്രതയിലൂടെ കടന്ന് പോകുന്നതിനിടെയാണ് ഈ കണക്കുകൾ പുറത്തുവരുന്നത്. ലോകമെമ്പാടുമായി രോഗം സ്ഥിരീകരിച്ചവരുടെ എണ്ണം 8,00,000 കടന്നിട്ടുണ്ട്.

Related posts

ശോഭനയുടെ മീ ടൂ (#Metoo): ഞെട്ടിത്തരിച്ച് സിനിമാലോകം

Amal Murali

ഐഎസ് അനുകൂലികള്‍ ഡല്‍ഹിയില്‍ നുഴഞ്ഞുകയറി; ആക്രമണം നടത്താൻ സാധ്യതയുണ്ടെന്ന് മുന്നറിയിപ്പ്

Web Desk

‘കിട്ടിയതൊക്കെ ബിജെപിക്ക്’; ബംഗാളിലെ വോട്ടുചോര്‍ച്ചയെ കുറിച്ച് യെച്ചൂരി

Web Desk